«РАЙДА-2017»

Ме чужи август 23лунö 1997 воын Сыктывдін районса Ыб сиктын. 2003-2014 воясын велöдчи Ыбса шöр школаын. Вит арӧссянь ветлӧдлi Захаров культура керкаӧ, велӧдчи быдсяма кружокъясын, йӧктi, сьылi, ворсi сценкаясын да детскӧй спектакльясын. Артистасьныс да йӧктыныс велӧдiс менӧ муса мамукӧй - Решетникова Вера Викторовна. Ме ичӧтсянь быдлаын участвуйтi, концертъяс вылын сьылi, лыдди кывбуръяс, ветлӧдлi конкурсъяс вылӧ. Менам эм зэв уна грамота да диплом сы кузя. Миян семьяын ми пыр сьылам да тешитчам, олам серамбанӧн, зэв дружнӧя. Ме зэв ёна радейта понъясӧс да каньясӧс, гортын миян кык кань да пон. Сiдзжӧ ме радейта ворсны баскетболӧн, енмыс тай сетӧма тушаӧс сы вылӧ. Нимкодьысь радейта видзӧдны да велӧдчыны, кыдзи мамӧй пусьӧ да пожасьӧ, ок и чӧскыд сылӧн артмӧ. Вот и ме мунi велӧдчыны Коми Республиканскӧй Агропромышленнӧй Техникумӧ повар-кондитер вылӧ, ме чайта, мый тайӧ зэв бур да колана профессия, шмонитӧмӧн шуа: пыр нин пӧт лоан. Зэв ёна гажтӧмся аслам сиктысь, гортысь, мамысь, гажтӧмся аслам челядьдырся кадсьыс, кодi лэбыштiс тай ой ӧдйӧ. А меным кӧть и кызь арӧс, менам сьӧлӧмӧй да долыдлунӧй дас арӧсалӧн кодь, ме радейта посни челядьӧс, ме некор ог элясь сьӧкыдлун вылӧ, ог ропкы лёк йӧз вылӧ, збоя да паськыда воськовта выль лунӧ!